मेरा गणितका गुरु !

मेरा गणितका गुरु !
मैले घोकेका साध्य र ज्यामितीहरु
आयतन र परिमितीहरु
अनि ती बिजगणितका डरलाग्दा
´ए` र `बि´ का सूत्रहरु
खोइ कहिले, कहाँ काम लाग्छन् ?
जो नजानेर कयौं पटक चोट पाएका थिए ती मेरा कलिला हातहरुले
कयौं पटक मुर्गा बनाइएका थिए चौरमा
कयौं पटक उभिनु परेको थियो डेस्कमाथि
र जबर्जस्ति जाने बनाइएको थियो मलाई
मानौंकी मेरो जिन्दगी अब फलिफापको बाटोमा अगाडी लाग्यो
तर अचेल मलाई हजारबार जिन्दगीले फेल घोषणा गर्छ ,
हिसाब मिल्दै मिलेन जिन्दगीको
गुरु कुन सूत्रको प्रयोग गरुँ म?
बाको रसिला आँखाको आयात कसरी निकाल्नु ?
आमाको हातको ठेलाको घनत्व कसरी नाप्ने ?
प्यारीको अभाव
र छोराछोरी भोकको क्षेत्रफल निकाल्ने सूत्र के हो ?
हजुरबुवाको लौरो कुन सूत्रले अड्याउने ?
माइन्स माइन्स प्लस हुने सूत्रमा
`दुख दुख ´ सुख हुन नसकेर फेरि दुख नै हुनु पर्ने
आँसु आँसु हासो नभएर पुनः आसु नै हुनु पर्ने
यो कुन नियम हो ?
जो मलाई सिकाउदै सिकाइएन
ब्ल्याकबोर्डको त्रिभुज र चतुभुज खुब नापियो ।
भित्री कोण र बाहिरी कोण नापियो ।
डिग्री डिग्री नापियो ।
एङल एङल नापियो ।
तर जिन्दगी त हजारौं भुजाले बनेको हुदो रहेछ ।
न नापिन्छ न देखिन्छ कुनै दृश्यमा ।
न लेखिन्छ न छापिन्छ कुनै पानामा ।
भित्री कोण र बाहिरी कोण कहाँ हुदोरहेछ र?
रहस्य र जालझेलका करोडौं कोण हुँदा रहेछन् ।
जसलाई नजरअन्दाज गराइएन कि ?
तै ले यसरी बाच्नु पर्छ भनी
सिङ्गो परिवार बन्धकी मा राखेर
हरियो पासपोर्ट परदेश हिदेको
घर छाड्दा गरुगो पाइलाको भार कुन ग्रामले नाप्छ ।
त्यो बिछोडिदाको मुटुको गति कुन मिटरले नाप्छ ।
ती झरेका आँसु कुन लिटरले नाप्छ ।
त्यो चोट को गहिराई कुन एकाइ ले नाप्छ ।
गुरु यसका कुनै सुत्र छैनन् ?
मेरा गणितका गुरु !
मलाई माफ गरिदिनुस है
तपाईको गणित जसोतसो उतिर्ण भएको म तर जिन्दगीको गणितमा लज्जास्पद अनुत्तीर्ण भैरहेको छु ।
गुरु मिल्छ भने भाइबहिनी हरुलाई
गणित सङ्ग जिन्दगीको हिसाब पनि
थोरै थोरै सिकाइ दिनुस् न है 😀